Во летото 1974, по иницијатива на светски признатиот гајдаџија Пеце Атанасовски и етномузикологот Живко Фирфов, Илија Лашкоски и други ентузијасти, во Долнени и Прилеп се одржа првиот регионален натпревар во гајда. Со поддршка на тогашните институции, натпреварот прерасна во Републички фестивал на народни инструменти и песни „Марко Цепенков„. По смртта на Пеце Атанасовски во 1996 година, со одлука на Советот, фестивалот го носи името на неговиот основач и е регистриран како Фестивал на народни инструменти и песни „Пеце Атанасовски“. Овој фестивал е единствен од ваков вид во земјава и главна задача му е да ги сочува од исчезнување древните и драгоцени вештини на свирачите на народни инструменти и пејачите на изворните народни песни.
Фестивалот има меѓународен карактер и на него во изминатите 51 година учествувале околу 10.000 инструменталисти од Македонија и надвор од неа. Токму ваквиот интерес на учесниците ја определува и ја прави специфична мисијата на фестивалот, со која се овозможува презентирање на својот фолклор, размена на искуства, развивање на пријателства и комуникација меѓу народите. Во центарот на село Долнени се наоѓа и музејот на Фестивалот.
Фестивалот се одржува во викендот после празникот Спасовден, кога е и селска слава на Долнени.